ضيعت سنين من عمرىمع واحدة عاجزه
نجلاء وقفت.
— لأ يا حسام، إحنا مش متفقين عليك. إحنا بنسألك ليه بتكدب وتهين واحدة عاشت معاك سبع سنين!
بص حواليه، ولاحظ إن محدش بيدافع عنه.
حتى أمه اللي كانت قاعدة في آخر القاعة، قامت وقربت منه.
قالت بعصبية:
— إيه اللي بيحصل هنا؟! إنتِ جاية تبوظي فرحة ابني يا مريم؟
بصيتلها.
— أنا جيت بدعوة من ابنك يا طنط.
ردت:
— وكان المفروض ترفضي!
طلعت الدعوة ووريتهالها.
— وابنك كان المفروض يحترم نفسه وميرميش الكلام ده في وشي.
بصت للورقة، وسكتت لحظة.
لكنها رجعت تقول:
— ما هو برضه كان نفسه يخلف!
قلت:
— وأنا كان نفسي أبقى أم. بس الفرق إني عمري ما عايرته بحاجة مش بإيده.
نجلاء بصت لحماتها وقالت:
— ماما فاطمة، حضرتك كنتِ عارفة إن عند حسام مشكلة في التحاليل؟
حماتي القديمة اتلخبطت.
— مشكلة إيه؟!
نجلاء كررت السؤال.
— كنتِ عارفة ولا لأ؟
حسام حاول يمنعها.
— خلاص يا نجلاء!
لكن أمه قالت من غير ما تاخد بالها:
— يا بنتي دي كانت حاجة بسيطة والدكتور قال إنها تتعالج!
القاعة كلها سكتت.
بصيتلها وأنا مش مصدقة.
— يعني إنتِ كمان كنتِ عارفة؟!
بصتلي بخوف.
قلت:
— كنتِ عارفة، وبرضه كنتِ كل يوم تقوليلي إني حرمت ابنك من الخلفة؟!
مردتش.
— كنتِ عارفة وأنا بعيط قدامك، وبتوسل ليكي تدعيلي، وإنتِ بتقوليلي إن ربنا بيعاقبني؟!
وشها احمر.
— أنا مقلتش كده!
قلت:
— قلتي يا طنط… وأنا عمري ما نسيت.
حسام شد أمه من إيدها.
— يلا يا أمي، كفاية.
لكن نجلاء قالت:
— استنى.
بص لها.
— إنت عارف أنا أكتر حاجة وجعتني في الموضوع ده إيه؟
مردش.
قالت:
— مش التقرير… ولا حتى إنك خبيت عني نتيجة قديمة. اللي وجعني إنك قدرت تظلم واحدة سبع سنين، وبعد ما طلقتها فضلت تطاردها بإهانتك.
حسام قال:
— إنتِ مراتي، ومينفعش تتكلمي معايا كده قدام الناس.
ردت:
— وهي كانت مراتك برضه، ومكنش ينفع تتكلم عنها كده قدام الناس!
وقتها حسيت إن حاجة تقيلة كانت على صدري واتشالت.
مش علشان حسام اتفضح.
لكن علشان لأول مرة حد من عيلته الجديدة وقف وقال إن اللي عمله غلط.
كنت خلاص همشي.
لكن نجلاء نادتني تاني.
— مريم… سؤال أخير.
بصيتلها.
— إنتِ كنتِ تعرفي إن حسام متجوزني من تلات سنين؟
قلت:
— أيوه، سمعت.
— وكنتِ تعرفي إنه قبل ما يتجوزني، كان بيقول لأهلي إنه طلقك علشان إنتِ رفضتي العلاج؟
اتجمدت.
— رفضت العلاج؟!
