ضيعت سنين من عمرىمع واحدة عاجزه

— كدابة!

بصيتله.

— طب ليه خبيت التقرير عني؟

سكت.

كملت:

— فاكر يوم ما الدكتور طلب منك تعيد التحليل؟ فاكر لما رجعت البيت وقلتلي إن النتيجة سليمة، وإن الدكتور أكد إن المشكلة كلها عندي؟

حسام بص للأرض.

— أنا كنت متضايق وقتها.

— متضايق؟! علشان كنت متضايق، حملتني ذنب سبع سنين؟!

دموعي نزلت رغمًا عني.

كنت فاكرة إني نسيت كل حاجة.

لكن وأنا بتكلم، رجعتلي ليالي كتير.

ليلة كنت فيها نايمة على الأرض من التعب بعد العلاج، وهو دخل وسألني ليه الأكل لسه متعملش.

وليلة تانية كنت بعيط فيها، فقال لي:

— كفاية تمثيل دور الضحية.

ويوم ما أمه قالتلي قدام الناس:

— البيت اللي مفيهوش عيال مالوش لازمة.

كل الذكريات رجعت مرة واحدة.

قلتله:

— أنا مكنتش زعلانة إن ربنا مأذنش بالخلفة وقتها، قد ما كنت موجوعة إن أقرب إنسان ليا بدل ما يسندني، كان بيكسرني.

نجلاء كانت بتسمع وساكتة.

وبعدين سألت حسام:

— إنت فعلًا كنت عارف إن نتائجك مش طبيعية؟

رد بعد تردد:

— كانت فيه شوية مشاكل بسيطة، والدكتور قال إنها ممكن تتحسن.

قلت:

— أهو ده اللي كنت عايزاك تعترف بيه من زمان.

نجلاء بصتله.

— طب ليه قلتلي إن مريم هي السبب الوحيد في الطلاق؟

حسام رد:

— علشان هي كان عندها مشكلة برضه!

نجلاء قالت:

— وده يديك الحق تهينها؟!

مردش.

ساعتها اتدخلت حماته الجديدة، الست سامية، اللي كانت واقفة جنب ترابيزة الهدايا.

قالت:

— يا جماعة كفاية كلام في المواضيع الخاصة دي، بنتي حامل ومش ناقصة تعب.

بصيتلها وقلت:

— معاكي حق يا طنط، وأنا أصلًا كنت ماشية.

لكن نجلاء مسكت إيدي.

— استني يا مريم.

بصيتلها.

قالت بصوت واطي:

— هو حسام كان بيقولك إنك مش ست كاملة علشان مخلفتيش؟

اتصدمت من السؤال.

— أيوه… ليه؟

دموعها نزلت.

— علشان هو قاللي نفس الجملة عنك أكتر من مرة.

حسام صرخ:

— نجلاء!

لكنها كملت:

— كان كل ما نتخانق، يقولي احمدي ربنا إني اخترتك، وإنك قدرتي تديني اللي مراتي الأولى مقدرتش تديهولي.

بصيتلها بحزن.

قالت:

— وفي مرة قلتله إن الخلفة رزق من ربنا، وإن محدش يعرف بكرة فيه إيه… اتعصب عليا وقاللي متدافعيش عنها.

سكتت لحظة، وبعدين قالت:

— أنا مكنتش أعرف إنه أذاكي بالشكل ده.

قلت:

— إنتِ ملكيش ذنب في اللي حصل بيني وبينه.

لكن حسام كان لسه بيحاول يقلب الموضوع.

قال:

— يعني إنتوا الاتنين متفقين عليا؟!