حماتى قصت شعرى
أحمد قرب وقال:
— خلاص يا مريم… بقينا لبعض.
ضحكت:
— لسه مش مصدقة.
— صدقي، ومن النهارده محدش هيقدر يفرقنا.
وفجأة…
حسيت بشدة قوية في شعري.
اتوجعت وصرخت:
— آه!
وقبل ما ألف، سمعت صوت معدني حاد.
تك… تك… تك!
وبعدين حسيت إن وزن الضفيرة اختفى من على ضهري.
لفيت بسرعة.
وشفت المنظر اللي عمري ما هنساه.
حماتي واقفة ورايا، ماسكة مقص كبير في إيد، وضفيرتي الطويلة في الإيد التانية.
كانت رافعاها قدام الناس كأنها كسبت جايزة!
صرخت:
— إنتِ عملتي إيه؟!
بصتلي وضحكت:
— مبروك يا عروسة!
مديت إيدي ورا رقبتي.
شعري كان متقصوص بشكل غير متساوي، خصل طويلة وخصل قصيرة، والضفيرة كلها اختفت.
حسيت إني مش قادرة أتنفس.
— إنتِ قصيتي شعري؟! ليه؟! إزاي تعملي كده من غير إذني؟!
قالت بمنتهى البرود:
— يا بنتي اهدي! دي عادات وتقاليد عيلتنا.
— عادات إيه؟!
— العروسة الجديدة لازم نقص شعرها يوم فرحها، علشان تبدأ حياة جديدة وتسيب دلع البنات وراها!
بصيت لأحمد.
كان واقف مكانه، مش مصدق.
وبعدين قال بصوت عالي:
— إنتِ عملتي إيه يا أمي؟!
ردت:
— عملت اللي لازم يتعمل يا أحمد. ما تكبرش الموضوع.
— إنتِ مدركة إنك مسكتي شعر مراتي وقصتيه بالعافية؟!
ضحكت:
— يا ابني ده شعر وهيطول! هو أنا قطعتلها إيدها؟!
الجملة دي كسرتني أكتر من المقص نفسه.
بدأت أعيط.
مش علشان شعري بس.
علشان الإهانة.
علشان إنها اختارت أكتر يوم كنت مستنياه، وقدام كل الناس اللي بحبهم، علشان تثبت إنها تقدر تعمل فيا اللي هي عايزاه.
أمي جريت عليا وحضنتني.
— حسبي الله ونعم الوكيل! إزاي تعملي كده في بنتي؟!
حماتي ردت بسخرية:
— يا مدام، إحنا ما قت\لناش حد! إنتوا عاملين جنازة ليه؟!
أبويا قرب منها وقال بغضب:
— إنتِ عارفة معنى اللي عملتيه؟ دي بنتي مش لعبة في إيدك!
لكنها رفعت راسها وقالت:
— وأنا أم العريس! ومن حقي أعرف العروسة اللي داخلة عيلتي هتسمع الكلام ولا لأ!
ساعتها أحمد مسك المقص من إيدها وحطه بعيد.
وبص لها بنظرة مرعبة.
— إنتِ كنتِ بتختبريها؟
ردت بتحدي:
— أيوه! وطلعت مدلعة ومش مستحملة حاجة!
أحمد سكت لحظة.
وبعدين بص للضفيرة اللي لسه ماسكاها.
مد إيده وقال:
— هاتي شعر مراتي.
ضحكت:
— هتعمل بيه إيه؟
كرر بصوت أقوى:
— هاتيه يا أمي.
ناولته الضفيرة وهي متضايقة.
أحمد لفها بعناية وحطها في كيس صغير جابه من ترابيزة الهدايا.
